يوم من عمرى
النهارده كان 31/7/2008
النهارده كان يوم مشهود
النهارده كان يوم مشهود
كان آخر يوم
فى آخر راوند
فى آخر سنة
ليا فى الكليه
(ان شاء الله)
النهارده سلمت على صاحباتى
اللى كانوا معايا فى الراوند
أًصدقاء الشقاء
اللى ياما قعدت معاهم نستنى الدكتور بالساعتين و التلاته
أو وقفت معاهم قبل الامتحان
نراجع اللى احنا ذاكرناه
و نكتشف ان احنا سايبين نص المنهج تقريبا
و نخرج من الامتحان نطمن على بعض
و نلاقى نفسنا عاكين فى الامتحان
و برده نضحك
النهاردة كان فيه محاضرة جراحه
للدفعه كلها
و انا قاعده فى المدرج
جه فى بالى ان دىاحتمال تكون آخر محاضره
أشوف فيها دفعتنا مع بعض
قعدت ابص فى وشوش الناس
اللى قضيت معاهم 6 سنين من عمرى
دفعه خنيقه فعلا
بس برده عشره
بجد هيوحشونى
قعدت مع صاحباتى فى آخر المدرج
فضلنا نرغى و نهرج كالعاده
و ما سمعناش و لا كلمة من الدكتور
لأن الميكروفون كان بايظ
و فى نص المحاضره
و كنتيجه حتميه للظروف السابقة
حطيت دماغى على البنش
و نمت
و الله هتوحشنى أيام الدراسة
(ملحوظه موف رفيعه
للناس اللى هتستغرب انى لسه بدرس مع اننا فى الصيف
ياجماعه كليتنا ملهاش علاقه بالناس الطبيعيين دى ماشيه مع نفسها كده
فما تقلقوش يعنى)
14 قالوا اللى فى دماغهم:
السلام عليكم ورحمه الله وبركاته
hhh اول تعليق الحمد الله
بجد اصعب حاجه لحظه الفراق مع حد عشت معاه لحظات جميله ولحظات قاسيه
بس ان شاء الله يرزقك منهم الصالح وتبقى على اتصال بيهم على طول
ويرزقك العمل الصالح والحلال ان شاء الله
جميل اوى الشعور ده فيكِ
شعور حب العشره
وبجد كلامك جميل اوى
دمتى بكل حب وخير وسعاده وراحه بال ومن طاعه الله اقرب
والله الموفق
فكرتيني بأغنية ماجده الرومي في فيلم عودة الأبن الضال اخراج الراحل يوسف شاهين: معقول يا ولاد بنقول باي باي
يارب تنجحي وتتخجى يارب وتبقى دكتوره قد الدنيا انا عارفه انكو بتدرسو في الصبف ماانا اخويا دكتور
اصعب حاجه الفراق بس عادى الحياه تستمر وتستمر لاحلى انشاء الله
تحياتى
مصطفى الطيب
مبوسطه انك اول تعليق
هو الفراق صعب بجد بس الحمد لله انا لسه هشوفهم تانى
ااااامين
ربنا يكرمك يارب
نورتنى
فى رعاية الله
السلام عليكم
شريف الصيفى
أنا فعلا بفكر فى الاغنيه دى الايام دى وهى بجد بتعبر عن الاحساس اللى حاسه بيه دلوقتى
أسعدتنى زيارتك و نورت المدونه
السلام عليكم
ماء تشرين
ربنا يكون فى عون كل اللى بيدرسوا فى الصيف او فى الشتا
و الله الدكاتره دول غلابه
ربنا يكرمك يارب
هى الفكره انك مش بس بتودعى مكان او ناس
انتى بتودعى مرحله من عمرك
بس زى ما بتقولى الحياه بتستمر
و ان شاء الله اللى جاى احلى
أسعدتنى زيارتك
السلام عليكم
ههههههههه
حلوة حتة النتيجة الحتميه دي
كل الناس اللي بتنام بتحط غلطها في الميكروفون حتى انا
ههههههههه
بجد انا حاسس بشعورك اللي اجلا او عاجلا هجربه وربنا يوفقك في حياتك العمليه بأه
الا هيه دي كلية طب
يارب ابعدنا يارب
تحياتي
فكرتينى باخر يوم ليا فى الكلية فى سنة اولى تحديدا.. انتى بتوصفى نفس احساسنا.. مش ممكن اللحظات دى تتعوض.. اللى بيختلط فيها الفرح الشديد بالشجن
سلام عليكم...........
مبرووووووووووووووووك
ياااااااااااااه اخيرا خلصتي الكلية العجيبة دي
حمدلله علي سلامتك...بس خلي بالك انتي لسه بتقولي يا هادي في تعليم الطب"من بؤك"
تعرفي...انا رايحة سنة 5 ان شاء الله ومش عايزة اليوم ده يجي لاني بجد مش هاقدر عليه انا باحب دفعتي جدا اللي اعرفه واللي معرفهوش
وفي نفس الوقت نفسي اتخرج
كل البشر اتخرجوا السنادي وانا قاعدة جنب مااااااااامي
الف مبروك وشدي حيلك بالتوفيق ان شاء الله
white heart
و الله انا كنت حاضره و ناويه اركز و الاعمال بالنيات
هههههههه
ان شاء الله و نبقى نبارك لك على التخرج
ما هو ربنا بعدك عن الطب يا محظوظ و دخلت هندسه
يللا
شكرا على التعليق
أسعدتنى زيارتك
السلام عليكم
صباح الصباح
فعلا بتبقى لحظات حلوه و صعبه اوى
و مش بتتعوض
أسعدتنى زيارتك ونورت المدونه
السلام عليكم
رووومى
الله يبارك فيكى
الحمد لله خلصت الدراسه بس لسه الامتحانات جايه كتيييييير
يوم التخرج على اد ما هو صعب بس بجد حلو اوى
هو انا لسه ما جربتوش بس بجد مش عارفه انا يومها ممكن اعمل ايه
ده انا حالفه لاكسر قله فى الكليه
ربنا يخليكى
شدى حيلك انتى اللى طالعه للباطنه
ربنا يكون فى عوننا كلنا
نورتينى بجد
السلام عليكم
يا سلام أخر يوم ليكى فى الكلية
بجد بجد يا بختك
معلشى أصحابك هتقابليهم بعدين
إنما الحرية متتعوضشى
عقبالى يارب
maiosha
انا عارفه انتى بالذات الدراسه معذباكى
ربنا يكون فى عونك
احساس الحريه هقولك عليه اول ما اخلص الامتحانات
و عقبالك ان شاء الله
نورتى المدونه
السلام عليكم
إرسال تعليق