a wish

just wanna fly away

صفحة بيضا

أحداث مرت بيا

تجارب و خبرات عشتها

مشاعر حستها

و ناس عرفتهم

أوقات مرت عليا

*

عايزة أعمل لها undo

أمحيها من حياتى

و أشيلها من ذكرياتى

*

مش عايزة أسمع أغنية ألاقيها بتفكرنى بحد

أو أروح مكان أفتكر فيه حدث وحش

عايزة أشيل مرارة الذكريات من جوايا

نفسى أرجع صفحة بيضا زى الأطفال

و مسمحش لحد انه يشخبط عليا

*

* * *

*

كل شىء صار مرا فى فمى ........بعد ما أصبحت بالدنيا عليما

آه مـن يـأخـذ عـمـرى كـلـه ........و يعيد الطفل و الجهل القديما

الأبيات لإبراهيم ناجى

غرائب رمضانية

غرائب رمضانية

20 يوم من مروا من رمضان

بجد مش مصدقة

حاسة انى كنت لسه امبارح بستعد لرمضان

ربنا تقبل منا صيامنا و قيامنا

البوست ده كنت عايزة أنزله فى أول رمضان

بس الوقت سرقنى و مالحقتش

يللا خير

* * *

ورقة و ورقة

الموقف ده حصل فى أول يومين فى رمضان حوار سمعته غصب عنى لأن أطرافه كان صوتهم عالى جدا

هو:عاملة إيه فى رمضان؟

هى:المسلسلات كتيرة جدا لدرجة انى قعدت أقلب فى التليفزيون و أتفرج على كل حاجة و دلوقتى مش فاكرة أنا اتفرجت على إيه و لا فاكرة المسلسلات بتاعة مين

أنا فى عقل بالى : يا عينى يا بنتى صعبتى عليا و قطعتى قلبى حد يديلها دليل التليفزيون يا جماعة

هو : ما هما بيستهبلوا أصلا جايبين مسلسلات كتيرة جدا فى رمضان عارفة أحسن حاجة تعمليها إيه

أنا فى عقل بالى : أيوة دلوقتى يديها النصييحة الجامدة و يقولها تقفل التليفزيون و تقوم تصليلها ركعتين ينفعوها

هى : إيه

أنا فى عقل بالى : إيه؟؟؟

هو : انتى تجيبى ورقة و قلم و تكتبى اسم كل مسلسل و اسم القناة و الوقت و تعلمى صح جنب المسلسلات اللى تعجبك علشان دى اللى تبقى تتابعيها

أنا : يالهوىىىىىىىىىى

*

خلاصة الكلام اللى فوق ده إن أيوه كلنا متفقين إن اللى الممثلين و المنتجين و أصحاب القنوات الفضائية بيعملوه فى رمضان ده حاجة غلط و مستفزة و ذنب عليهم

بس برضه مش هننكر إن كل واحد فينا عنده إراده و عنده ريموت كونترول ممكن يستجمع إرادته و يطفى التليفزيون و يقوم يعمل حاجة كويسة لو هو عايز

*

بعدها بيوم أو يومين كنت بتفرج على برنامج دينى فلقيت الشيخ بيقول

إننا عايزين و إحنا بنقرأ القرآن نطبقه فى حياتنا تطبيقا لمبدأ سنحيا بالقرآن

و قال نجيب كراسة أو حتى ورقة و نقسمها نصفين نصف نكتب عليه الأوامر و نصف نكتب عليه المنهى عنه

و نخليها جنبنا و احنا بنقرأ

و لما تيجى آية فيها أمر نكتبه فى نصف الأوامر

و لما تيجى آية فيها نهى نكتبه فى المنهى عنه

و بعد كده نمسك الورقة و نحاول إننا كل أسبوع نطبق مجموعة من محتوياتها

و بكده نكون بنحاول نقتدى بالنبى عليه الصلاة و السلام لأنه كان خلقه القرآن

قلت فى نفسى سبحان الله

شوف الفرق بين ورقة و ورقة

* * *

بمناسبة سنحيا بالقرآن

للناس اللى مش بيتابعوا برنامج الأستاذ عمرو خالد

هو عامل حملة اسمها سنحيا بالقرآن

هدفها 10 مليون ختمة فى رمضان

يا ريت يا جماعة اللى يختم يدخل يسجل الختمة على

amrkhaled.net

و لو حد فى أهلك أو فى أصحابك مش بيعرف يدخل على النت و ختم القرآن

ادخل انت و سجل له الختمة

* * *

غريبة

ربنا أمرنا إننا فى نهار رمضان نصوم عن حاجات هى فى الأصل حلال

و طبعا المفروض إن الصوم عن الحرام ده أصلا موجود نهار و ليل فى رمضان و فى غير رمضان

فلازم تستغرب لما تلاقى الناس فى رمضان صايمين عن الحلال لكن بيعملوا معاصى عادى جدا

يعنى صايم و مش بيصلى

أو صايمة و مش محجبة و الأسوأ انها حتى مش محتشمة فى لبسها لأ عادى القصير و الضيق مفيهوش أى مشاكل

أو صايم و واقف مع شلة البنات بيهزروا و بيضحكوا و صوتهم جايب آخر الدنيا

أو صايم و واخد صاحبته ( متصاحبين يعنى أو بطريقة أسامة منير مرتبتشين) و بيتمشى بيها على كورنيش المستشفى

عايزة أقولهم واحد واحد

*

يللى مش بتصلى

ما درستش و انت فى ابتدائى و اعدادى و ثانوى

إن فى أركان الإسلام الصلاة قبل الصوم

و انها عماد الدين

و انها اول ما تسأل عنه يوم القيامة فإن فسدت فسد سائر عملك

و إن رمضان فرصة إنك تحاول تنتظم فى أى عبادة انت كنت سايبها قبل كده

لعل و عسى هدايتك تكون فى الشهر الكريم ده

*

يا أخت ياللى مش محجبة

على الأقل البسى حشمة

حاجة واسعة كده و لا طويلة

مش لازم تفطرى كل شاب تعدى من قدامه

معلش استحملى و لو حتى فى رمضان بس

و مين عارف جايز ربنا يكرمك و يثبتك بعد رمضان كمان

زمان كان عندى مدرس كان لما يلاقى واحدة اتحجبت فى رمضان يسألها ده ى رمضان بس و لا على طول

لو قالت له فى رمضان بس كان بيقولها إن رب رمضان هو رب بقية العام

البنت كانت بتتحرج

و تلاقيها جت تانى يوم من غير الحجاب

يا عم كنت سيبها

مش جايز بعد 30 يوم حجاب

كانت تيجى تقلعه فى العيد تتكسف و تخجل من نفسها

و تقرر إنها تتحجب على طول

و ربنا يهديها

*

الاخوة بتوع الاختلاط و الصحوبية

الاختلاط حرام أكيد

إلا لو كان لضرورة ملحة و يكون فى حدود

و اللى انتم بتعملوه مش ضرورة

و أنا مش شايفة ما بينكم حدود

*

ياللى صايمين عن الحلال

برضه الصوم عن الحرام فرض

*

رغيت كتيركفاية كده بقى

لو حد شايف اى معلومة من اللى فوق غلط يكتب لى فى التعليقات علشان أصلحها و يبقى جزاه الله خيرا

*

كله يشد حيله فى العشرة الأواخر

وفقنا الله جميعا إلى ليلة القدر

*

اللهم إنك عفو تحب العفو فاعف عنا

رمضان كريم

رمضان كريم

بدأ الشهر المبارك

و هلت نفحات الإيمان

اللهم إنا نسألك العتق من النيران

كل عام و أنتم بخير

عدة أسباب أدت إلى الاكتئاب

عدة أسباب أدت إلى الاكتئاب

تنبيه لابد منه : هذا البوست يسحتوى على كمية كبيرة من الاحباط ، على من لا يرغب فى قراءته قراءة هذا الجزء الملون و الدعاء

***

منذ ما يقرب من ثلاثة أشهر و أنا أعانى من حالة اكتئاب شديدة زادتنىانعزالا عن العالم فوق انعزالى

حالة اكتئاب جعلتنى لا أرغب فى الذهاب إلى العمل ،لا أرغب فى الخروج للنزهة ،لا أرغب حتى فى مغادرة حجرتى

كل ما أفعله فى يومى هو نوع من الواجب و روتين لا يتغير

أستيقظ كل يوم قبل موعد نزولى بما يزيد عن الساعة و بالرغم من ذلك أنزل متأخرة عن موعدى

الخطوات اليومية المكررة الاستحمام بالماء البارد و ذلك الشعور بأن المياة تذيب مع حرارة جسدك كل همومك و تلك القطرات التى تسيل على وجهى ، هل هى دموع؟

بعد الخروج من الحمام يتلاشى الشعور الزائف بالانتعاش ليحل محله الاكتئاب مرة أخرى ، كوب الشاى الساخن لا يفلح فى إفاقتى

أرتدى ملابسى ببطء ، لا شىء يحمسنى للذهاب غلى العمل هكذا أنزل متاخرة

الاحباط هو اسم اللعبة

إحباط على المستوى المهنى

بكالوريوس طب و جراحة بتقدي عام امتياز و النهاية طبيب لا حظ له من لقبه سوى بالطو أبيض كان يوما ما حلما فصار اليوم كابوسا

وظيفة طبيب الامتياز يمكن تلخيصها فى عامل و ممرضة ، قياس الضغط و سحب العينات و إعطاء الأدوية هو الجزء التمريضى ، أما الجزء العمالى فهو تلك الريكويستات اللعينة التى تجعلك تتساءل و أنت تسير بجوار المريض حاملا تذكرته فقط لتوصيله إلى مكان آخر فى المستشفى عن سبب احتياجهم فى هذه المهمة لطبيب

تتذكر الآن حرصك على الاستذكار طوال سنين حياتك لتحقيق حلمك و تتساءلين الآن عن السبب الذى جعلك تلتحقين بهذه الكلية أو ترغبين بهذه المهنة أصلا

إحباط على المستوى الاجتماعى

الفشل التام فى التواصل بين جيل الآباء و جيل الأبناء و عدم القدرة على التواصل مع الأصدقاء ، حتى الابتسامة التى هى الطريق إلى قلوب الناس صارت جهدا لا تقدرين على عمله

الشعور و أنت تجلسين بين أقرب الناس بأنك غريبة و أن بينك و بين من يجلس بجانبك مسافة شاسعة أصواتهم تغطيها أصوات عديدة داخل رأسك لا تقدرين على إسكاتها أو على إسكاتهم فلا تملكين سوى جمع أشيائك و الرحيل

هناك من قال بأنه شعور قاس حين تدركين أن حياة الآخرين تستمر و لا تتوقف عندما نموت الواقع أن الأكثر إيلاما هو أن تشعر أن اختفائك من حياتهم و أنت حية ترزقين لا يشكل فارقا بالنسبة لهم و لا يفقدهم القدرة على الاستمتاع

تتوقين لذلك الشعور بالاهتمام بيد حانية تربت على كتفك أو حضن دافىء يضمك لكن للأسف لا تجدين كل هذا

إحباط على المستوى العاطفى

حتى الشخص الوحيد الذى أحببتيه تدركين بعد فترة أنه لم يهتم بك أبدا و أنه لم يشعر بك سوى بأنك ترضين غروره فيما عدا ذلك أنت بالنسبة إليه لا شىء لا تحتلين فى فكره أى مكان و أنك كنت موجودة لتمضية الوقت فحسب

مشاعرك البكر التى ادخرتيها للرجل المناسب أعطيتيها لمن لا يستحق تشعرين الآن بالخداع و أنك كنت مجرد دمية يتلاعب بها و بعواطفها

لا تثقين بالرجال و لا تثقين بالحب كلما تذكرته تشعرين بأنك كنت بلهاء تماما و لا بد أنه الآن يضحك منك فى نفسه تشعرين بالخجل من نفسك فتدفنين رأسك فى الوسادة تحاولين البكاء

جرح غائر فى القلب عجزت عن مداواته فتتركينه عل الأيام تتمكن من شفائه عسى أن تستعيدين الثقة و أن يضيع ذلك الشعور بعدم الأمان

***

إحباط فوق إحباط فوق إحباط ، جبال تتراكم فوق صدرى ، تشعرنى بالعجز عن التنفس ، أحاول البكاء فلا أستطيع ، أحاول الكلام فلا أجد من يستمع ، ومن يسمع لا يهتم

لم يبق أمامى سوى أن أغمض عينى كل ليلة و أتمنى أن تكون هذه هى الليلة الأخيرة

يا حبيبى روح

يا حبيبى روح

..

..

..

ليلة أخرى من ليالى الصيف،الوقت قد تأخر و الشارع هادىء فيما عدا صوت غناء خافت يصلها من مذياع الجيران

..

تخرج إلى شرفة حجرتها،نسائم الصيف الرقيقة تداعب خصلات شعرها وصوت الغناء صار أكثر وضوحا

..

..

ليالى هوانا غمرها النسيان

..

..

تغمض عينيها و تتساءل هل هى بالفعل قد نسيت هواه؟

..

بالطبع لا

..

فهى لا يكاد يذكر أمامها كلمة حب حتى تذكره

..

كانت حقا فتاة عنيدة أبت مشاعرها أن تستجيب لأى رجل أيا كانت صفاته و مميزاته حتى السن المتقدمة نسبيا التى

..

قابلته فيها لم تعرف للحب معنى حتى قابلته ، فجأه اكتشفت أنها انسان و أن لها قلبا يخفق و أن لها الحق فى الشعور

..

بأنها أنثى ،انجرفت فى حبه أعطته كل ما ادخرت من مشاعر الحب و الحنان و العطف و المودة ،كل ما يسكن بداخلها

..

من مشاعر أخرجته له،له فقط

..

كانت تعيش حياتها كالغريبة هو علمها أن تعيشها حقا، معه فقط كانت تشعر أنها حية و أن لها كيان، و لأول مرة تشعر

..

أنها حقا سعيدة

..

و حين تركها خلفها حطاما ، أخذ منها الحياة التى كانت تحركها

..

احتاجت إلى وقت طويل حتى تشفى من جرحها ،حتى تعلم قلبها القسوة أصبحت تخاف كل الرجال و تكره كل

..

الرجال تخشى أن تختلط بهم فقد يحطمها أحدهم مرة أخرى

..

..

شو جاى تخبرنى من بعد اللى صار

..

شو جاى تخبرنى لما انتهى المشوار

..

..

أنهى مكالمته معها منذ دقائق قليلة

..

حادثها من رقم غريب لا تعرفه ، بالرغم من ذلك استطاعت أن تعرف أنه هو قبل أن تجيب

..

صوته يدغدغ قلبها و حب ظنته قد مات عادت إليه الحياة

..

بصعوبة تحاول السيطرة على مشاعرها ، تذكر نفسها كيف تركها وحيدة دون أن يهتم

..

كيف عانت آلام فراقه و هو لا يسأل عنها ، كيف تركها و ذهب إلى أخرى

..

ردت عليه ببرود حتى شعر باليأس و أنهى المكالمة

..

بدأت دموعها تسيل على وجنتيها

..

أخفت وجهها بيديها

..

و أسئلة بلا إجابة تتردد فى صدرها

..

لماذا اتصل بها؟

..

لماذا أيقظ الذكريات و أعاد الآلام؟

..

لماذا؟

..

صدرها يهتز بالبكاء

..

و صوت نحيبها يعلو

..

و صوت الغناء مازال مستمرا

..

يا حبيبى روح بيكفى جروح

..

أنا كنت نسيتك شو اللى جابك ع بالى
..

..

الهبل له ناسه

الهبل له ناسه

من كام يوم كده

قعدت على الكمبيوتر

و كتبت بوست طويييييل

و بعدييين بعد ما خلصت كتابة

و أنا سرحانه كده

طلعت لى رسالة بتقول

do you want to save

قمت أنا و بكل ثقة

دست no

و ضاع البوست

صحيح

الهبل ليه ناسه

عودة

عودة

من زمان اوى ما كتبتش على المدونة

قصدى كتابة بنفس كده

زعلانة من نفسى

أنا كنت عاملة المدونة دى علشان تبقى بيتى التانى

و زعلانة لأنى سبت بيتى مهجور كده

مش بدخل فيه و مش بهتم بيه

مش عارفة ليه بطلت أكتب

جايز لأنى حاسة جوايا بفراغ و مش لاقية حاجة أكتبها

أو لأن الشهرين اللى قضتهم فى النسا كنت برجع مش شايفة قدامى و مش قادرة اكتب

بجد مش عارفة

كل اللى عارفاه ان التدوين وحشنى اوى

و انى نفسى أكتب

أى كلام و خلاص

الناس اللى على المدونات اللى أغلبهم برده الدنيا اخدتهم و بعدتهم

نعكشة

أحلى و أشقى و الذ بنوتة

دايما متابعة مدونتك

كنت بزعل أوى لما أحس انك مكتئبة

و أفرح لما الاقيكى مبسوطة و أحس فى كتاباتك بشقاوتك

زى البوست اللى حكيتى فيه لما رحتى الاوبرا

زعلت لما قفلتى التعليقات عندك

لأنى حسيت انى مش عارفة أوصل لك

خصوصا انى مش عارفة الايميل بتاعك

معلش انى ما ردتش على تعليقاتك

ده لأنى كان دايما عندى النية انى أكتب البوست ده

و أكلمك عن طريقه

أيوة طبعا

نعكشتى ما يتردش عليها فى اقل من بوست

دمتى سالمة يا قمر

عازفة الأوتار

عندما تجتمع رقة المشاعر و عذوبة الكلمات فى انسانه

واحدة من الناس اللى الدنيا خدتهم

و كتاباتها قلت

مش عارفة ده نتيجة الشغل و لا ايه

لعل المانع خير

بس بجد وحشتنى كلماتك

ما تطوليش الغيبة

فيه ناس كتير نفسى أتكلم عنهم

نفسى أطمن عليهم

يا رب تكونوا كلكم بخير

بجد وحشتوووووووووونى جدا

أحبكم فى الله

و بعد ليلة طويييييييييييلة

و أخييييييييرا

تشرق الشمس

معلنة انتهاء

أول ليلة ليا فى قسم النسا