shattered into pieces

قلبى هو المرآة التى حطمتها بقدمك فأصبحت صورتك فيها مشوهة إلى الأبد

شعور

أنا لا أريد أن أنساك، صدقنى أنا فقط أريد أن أذكرك دون أن تنساب دموعى فوق وجنتى

و دون أن أشعر بهذه الغصة فى حلقى و هذه اللوعة و الألم فى قلبى

ذكرى سنوية

اليوم ذكرى وفاة الأمل

و انتهاء القصة

و مرارة النهاية

البيت الثانى

أمد يدا مرتعشة إلى مفتاح الباب أدفعه بلطف فيحدث صريرا عاليا , أحقا مرعامين أو أكثر منذ كنت هنا آخر مرة ؟!
على ضوء المصباح الواهن أتأمل البيت المهجور و الأثاث المغطى بالملاءات كأشباح تقبع فى الظلام , أخطو و أغمغم بسم الله فأسمع لصوتى صدى يتردد فى البيت و كأته يعاتبنى على تركى لبيتى خرابا تنعق فيه البوم و يملأه نسيج العنكبوت و ذرات التراب
أهملت المدونة و اعتزلت الكتابة لأنى اكتشفت أن ما أكتبه يبعث على الكآبة فى النفس ناسية أنها ربما تكون مخرجى الوحيد من حالة الاكتئاب الدائم و العزلة التى صرت أعيش فيها
اتخذت اليوم قرارى بالعودة لبيتى و امتلأت بالنشاط فقمت لأزيل نسيج العنكبوت و أنفض ذرات الغبار , أزيل الملاءات المتسخة عن أثاثى الأنيق و أفتح النوافذ ليمتلئ بيتى بالهواء و لتغمره أشعة الشمس الدافئة لعلها تزيل ما علق ببيتى الحبيب من آثار الفراق و مر الذكريات و تعيد إلى روحى الحياة

a wish

just wanna fly away

صفحة بيضا

أحداث مرت بيا

تجارب و خبرات عشتها

مشاعر حستها

و ناس عرفتهم

أوقات مرت عليا

*

عايزة أعمل لها undo

أمحيها من حياتى

و أشيلها من ذكرياتى

*

مش عايزة أسمع أغنية ألاقيها بتفكرنى بحد

أو أروح مكان أفتكر فيه حدث وحش

عايزة أشيل مرارة الذكريات من جوايا

نفسى أرجع صفحة بيضا زى الأطفال

و مسمحش لحد انه يشخبط عليا

*

* * *

*

كل شىء صار مرا فى فمى ........بعد ما أصبحت بالدنيا عليما

آه مـن يـأخـذ عـمـرى كـلـه ........و يعيد الطفل و الجهل القديما

الأبيات لإبراهيم ناجى

غرائب رمضانية

غرائب رمضانية

20 يوم من مروا من رمضان

بجد مش مصدقة

حاسة انى كنت لسه امبارح بستعد لرمضان

ربنا تقبل منا صيامنا و قيامنا

البوست ده كنت عايزة أنزله فى أول رمضان

بس الوقت سرقنى و مالحقتش

يللا خير

* * *

ورقة و ورقة

الموقف ده حصل فى أول يومين فى رمضان حوار سمعته غصب عنى لأن أطرافه كان صوتهم عالى جدا

هو:عاملة إيه فى رمضان؟

هى:المسلسلات كتيرة جدا لدرجة انى قعدت أقلب فى التليفزيون و أتفرج على كل حاجة و دلوقتى مش فاكرة أنا اتفرجت على إيه و لا فاكرة المسلسلات بتاعة مين

أنا فى عقل بالى : يا عينى يا بنتى صعبتى عليا و قطعتى قلبى حد يديلها دليل التليفزيون يا جماعة

هو : ما هما بيستهبلوا أصلا جايبين مسلسلات كتيرة جدا فى رمضان عارفة أحسن حاجة تعمليها إيه

أنا فى عقل بالى : أيوة دلوقتى يديها النصييحة الجامدة و يقولها تقفل التليفزيون و تقوم تصليلها ركعتين ينفعوها

هى : إيه

أنا فى عقل بالى : إيه؟؟؟

هو : انتى تجيبى ورقة و قلم و تكتبى اسم كل مسلسل و اسم القناة و الوقت و تعلمى صح جنب المسلسلات اللى تعجبك علشان دى اللى تبقى تتابعيها

أنا : يالهوىىىىىىىىىى

*

خلاصة الكلام اللى فوق ده إن أيوه كلنا متفقين إن اللى الممثلين و المنتجين و أصحاب القنوات الفضائية بيعملوه فى رمضان ده حاجة غلط و مستفزة و ذنب عليهم

بس برضه مش هننكر إن كل واحد فينا عنده إراده و عنده ريموت كونترول ممكن يستجمع إرادته و يطفى التليفزيون و يقوم يعمل حاجة كويسة لو هو عايز

*

بعدها بيوم أو يومين كنت بتفرج على برنامج دينى فلقيت الشيخ بيقول

إننا عايزين و إحنا بنقرأ القرآن نطبقه فى حياتنا تطبيقا لمبدأ سنحيا بالقرآن

و قال نجيب كراسة أو حتى ورقة و نقسمها نصفين نصف نكتب عليه الأوامر و نصف نكتب عليه المنهى عنه

و نخليها جنبنا و احنا بنقرأ

و لما تيجى آية فيها أمر نكتبه فى نصف الأوامر

و لما تيجى آية فيها نهى نكتبه فى المنهى عنه

و بعد كده نمسك الورقة و نحاول إننا كل أسبوع نطبق مجموعة من محتوياتها

و بكده نكون بنحاول نقتدى بالنبى عليه الصلاة و السلام لأنه كان خلقه القرآن

قلت فى نفسى سبحان الله

شوف الفرق بين ورقة و ورقة

* * *

بمناسبة سنحيا بالقرآن

للناس اللى مش بيتابعوا برنامج الأستاذ عمرو خالد

هو عامل حملة اسمها سنحيا بالقرآن

هدفها 10 مليون ختمة فى رمضان

يا ريت يا جماعة اللى يختم يدخل يسجل الختمة على

amrkhaled.net

و لو حد فى أهلك أو فى أصحابك مش بيعرف يدخل على النت و ختم القرآن

ادخل انت و سجل له الختمة

* * *

غريبة

ربنا أمرنا إننا فى نهار رمضان نصوم عن حاجات هى فى الأصل حلال

و طبعا المفروض إن الصوم عن الحرام ده أصلا موجود نهار و ليل فى رمضان و فى غير رمضان

فلازم تستغرب لما تلاقى الناس فى رمضان صايمين عن الحلال لكن بيعملوا معاصى عادى جدا

يعنى صايم و مش بيصلى

أو صايمة و مش محجبة و الأسوأ انها حتى مش محتشمة فى لبسها لأ عادى القصير و الضيق مفيهوش أى مشاكل

أو صايم و واقف مع شلة البنات بيهزروا و بيضحكوا و صوتهم جايب آخر الدنيا

أو صايم و واخد صاحبته ( متصاحبين يعنى أو بطريقة أسامة منير مرتبتشين) و بيتمشى بيها على كورنيش المستشفى

عايزة أقولهم واحد واحد

*

يللى مش بتصلى

ما درستش و انت فى ابتدائى و اعدادى و ثانوى

إن فى أركان الإسلام الصلاة قبل الصوم

و انها عماد الدين

و انها اول ما تسأل عنه يوم القيامة فإن فسدت فسد سائر عملك

و إن رمضان فرصة إنك تحاول تنتظم فى أى عبادة انت كنت سايبها قبل كده

لعل و عسى هدايتك تكون فى الشهر الكريم ده

*

يا أخت ياللى مش محجبة

على الأقل البسى حشمة

حاجة واسعة كده و لا طويلة

مش لازم تفطرى كل شاب تعدى من قدامه

معلش استحملى و لو حتى فى رمضان بس

و مين عارف جايز ربنا يكرمك و يثبتك بعد رمضان كمان

زمان كان عندى مدرس كان لما يلاقى واحدة اتحجبت فى رمضان يسألها ده ى رمضان بس و لا على طول

لو قالت له فى رمضان بس كان بيقولها إن رب رمضان هو رب بقية العام

البنت كانت بتتحرج

و تلاقيها جت تانى يوم من غير الحجاب

يا عم كنت سيبها

مش جايز بعد 30 يوم حجاب

كانت تيجى تقلعه فى العيد تتكسف و تخجل من نفسها

و تقرر إنها تتحجب على طول

و ربنا يهديها

*

الاخوة بتوع الاختلاط و الصحوبية

الاختلاط حرام أكيد

إلا لو كان لضرورة ملحة و يكون فى حدود

و اللى انتم بتعملوه مش ضرورة

و أنا مش شايفة ما بينكم حدود

*

ياللى صايمين عن الحلال

برضه الصوم عن الحرام فرض

*

رغيت كتيركفاية كده بقى

لو حد شايف اى معلومة من اللى فوق غلط يكتب لى فى التعليقات علشان أصلحها و يبقى جزاه الله خيرا

*

كله يشد حيله فى العشرة الأواخر

وفقنا الله جميعا إلى ليلة القدر

*

اللهم إنك عفو تحب العفو فاعف عنا